JAMITA MINGGU ADVENT II, 04 DESEMBER 2011 JESAYA 63 : 15 – 19 ; 64 : 1 – 3

Patujolo :

Asa ummura antusanta turpuk on, ingkon jahaonta do nian mamungka sian ayat na dijolona. Molo tajaha angka hatorangan di jolo ni turpuk on sian ayat 10 – 14, dipaboa do angka pangalaho ni bangso Israel na manggunturi manang na memberontak nang mangarsahi Debata, marhite na marbalik sian dalan ni Debata. Hinorhon ni i, dipalalu Debata ma rimasNa tu angka na lilu i. Tung hansit do pambebeon ni rimas ni Tuhan i dohot tujuan, ndada asa laos mate bangsoNa i, alai asa muba do jala mulak nian muse tu Debata.

JAMITA MINGGU UJUNG TAON HURIA, 20 NOPEMBER 2011 MATEUS 12 : 33 – 37

Patujolo :

Ari na balga do minggu on mangihuthon kalender parhuriaon, ai minggu on ma na gabe pangujungi ni angka minggu, jala mamungka tu minggu na mangihut masuhanta ma taon baru huria, ima marhite angka minggu minggu advent. Somal do disosoi di minggu ujung taon on taringot tu na marujung do muse hita sian portibi on, tarida ma i marhite na sai dipatupa angka huria parningotan diangka dongan naung jumolo monding. Asa molo ditaringoti pe angka na monding, ndada na laho manungguli arsak ni angka sisolhot, alai asa lam adong do pangarimangion di hita taringot tu angka pangalahonta, asa marhite i adong nian hamubaon ni roha, ai ndang laho manongtong hita di portibi on.

JAMITA MINGGU 21 DUNG TRINITATIS ; 13 NOPEMBER 2011 Mateus 10 : 34 – 37

Patujolo :

Molo adong sungkun sungkun taringot tu hinatabo ni gabe halak Kristen, boi do tubu angka alus na marasing. Adong ma na mandok tabo jala sonang gabe halak Kristen, alai adong do ra na mandok ndang satorusna tabo gabe halak Kristen. Sasintongna molo bagas do pangantusionta taringot tu hakristenon, ndang hea diparbaga Jesus Kristus na ingkon tongtong tabo jala sonang molo gabe siihuthon Ibana hita di portibi on. Hea do memang didok Jesus, ro ma hamu tu au angka na loja jala na sorat, hupasonang pe hamu. Sada jaminan do i memang paboa na boi do Jesus mangalehon hasonangan tu hita. Alai di angka ayat na asing hea do muse didok Jesus, paboa nasa na mangihuthon Ibana ingkon rade do mamorsan silang. Silang dison manggombarhon sitaonon manang parungkilon do i humonghop Ibana.