JAMITA PASKAH I, 31 Maret 2013 ( MATEUS 28 : 1 – 10 )

 

PATUJOLO :

Sadarion tahalashon do  pesta parningotan di ari haheheon ni Tuhanta Jesus Kristus (Pesta Paskah). Ganup jumpang parningotan ari raya paskah, sai dipatubegehon do marhite jamita angka na masa di buhabuha ijuk hatiha na ro parompuan mandapothon tanoman ni Tuhan Jesus naung hehe i. Asa molo tung pe jumpang musengani panghalashononta di ari haheheon i sadarion, ringkot do mian sada “ perenungan” di hita : “ Nunga ro didia sasintongna pangantusion dohot panghangoluhononta taringot tu Jesus naung hehe i? Martamba do ulaning pangantusionta lumobi panghangoluhononta sian taon tu taon? Lam hehe do ulaning haporseaon nang panghirimonta sian taon naung tabolus sahat rodi sadarion? Manang boi dohonon, adong do ulaning na imbaru na so jumpang hita dibagasan angka taon nung salpu dohot sadarion di las ni rohanta di ari paskah on?

Asa tung mansai ringkot do sasintongna tongtong imbaru pangantusion nang haporseaonta manghangoluhon haheheon ni Tuhannta Jesus i, nang pe naung mulakulak dibaritahon na masa di buhabuha ijuk i sian taon tu taon. Asa unang gabe holan hasomalan sambing nian ari haheheon i di ngolunta.

HATORANGAN :

Ayat 1 – 4

Jotjot do digombarhon ia angka boruboru na ro tu tanoman on ima angka boruboru parholong na radot jala dungo di angka ulaon na denggan dohot lan na asing. Jala jotjot di angka huria dipatupa Pesta parheheon ni ina ditingki ari paskah. Gabe sai hira angka parompuan ido dipujipuji hinorhon ni harorona mandapothon tanoman ni Tuhan Jesus di buhabuha ijuk.

Alai sasintongna molo manat do tatimbangi na masa i, ndang haroro ni angka boruboru tu tanoman i nian sipujion. Molo tajaha do angka barita haheheon ni Tuhan Jesus di na opat buku evanggelium (Mateus, Markus, Lukas, Johannes), ro pe angka boruboru tu tanoman i
na bertujuan do i laho mamiahi bangke ni Jesus dohot angka miak na hushus (Luk 24:1). Hasomalan do di Palestina manopot kuburan ni naung tolu ari dikubur. Mangihuthon haporseaon nasida, di bagasan na tolu ari i, tongtong dope mangareapreap tondi ni na mate i di atas kuburan i. Alai dung salpu tolu ari, ditadinghon tondi ni na mate i ma kuburan i, alana bangke ni na monding i pe nunga mulai busuk, ndang boi be tandaon.

Molo di partingkian nuaeng hira pengawet ni mayat do na binoan nasida i. Lapatanna na ro do angka boruboru i laho manolophon hamatean ni Tuhan Jesus, ai na dirajumi nasida do paboa na ditanoman i nama satorusna Tuhan i, ido umbahen na pola disangkapi rohana laho mamiahi bangke ni Tuhan Jesus, asa anggiat boi awet bangke ni Jesus di roha nasida. Jadi na laho pe boruboru i tu tanoman ndada na marningot hata ni Jesus mandok na hehe muse, alai holan na laho maningkir tanoman do songon na nidok di ayat 1 turpuk on, manang laho mamiahi bangke songon na pinatorang ni evanggelium na asing.

Alai anggo na luar biasa sasintongna di barita na masa di buhabuha ijuk i, boruboru na ro tu tanoman ima na parjolo manjalo barita haheheon i jala na manjalo asi ni roha. On ma na sasintongna tapapujipuji, ima asi ni rohaNa tu angka parompuan i, ndang pambahenan ni angka parompuan i.

Dipatorang do dison na digulang surusuruan ido batu na manutup tanoman ni Tuhan Jesus. Sangombas idaon sai songon na adong do targombar di roha, na modom ma Jesus di tanoman I, dung i ro ma lalo, digulang ma batu i, dung i gabe boi ma ruar Tuhan Jesus sian tanoman i. Sasintongna ndang tusi pangantusion ni na masa i, ndang na mandok na ruar Tuhan Jesus sian tanoman dung magulang batu i. Ndang na masa lalo i laho manungguli Jesus asa hehe sian tanoman i.  Alai tung masa pe lalo na gogo jala tuat surusuruan i, “ALA NAUNG HEHE DO KRISTUS I “ . Boi dohonon : lalo na gogo i, parguling ni batu dohot parhundul ni surusuruan di ginjang ni batu i, sudena i laho mambahen sada boaboa do paboa naung hehe Kristus i. Anggo di buku evanggelium na asing, tanoman na kosong ido songon pertanda manang boaboa naung hehe Kritus sian tanoman, alai anggo di evanggelium Mateus on marasing do.

Ayat 5 – 7 :

Mansai lambok do pandohan ni surusuruan di turpuk on pabotohon barita haheheon i tu angka parompuan na ro tu tanoman. Ditogihon nasida asa ro jumonok laho mangida inganan hapeahan ni Tuhan Jesus (ayat 6), jala asa diida naung rumar tanoman i.

Na masa di buha buha ijuk i marudut do tu ulaon “Marbarita Nauli”.  Molo tajaha sude angka barita haheheon na tarsurat di evanggelium na opat i, dipabotohon do naingkon sai hatop nasida mardalan/marlojong paboahon barita i. Asa ima na manggombarhon ia barita haheheon i na ingkon marudut do i muse tu na mamaritahon barita i. Asa ingkon pararaton do barita las ni roha i tu angka na humaliang.

Diuduti surusuruan ido muse pabotohon barita na ringkot taringot tu haheheon i, ima marehite na paingothon naung dijoloani Tuhan Jesus do nasida tu Galilea (ayat 7). Hata dijoloani dison naeng mandok : ndang sae holan na hehe Jesus i, alai dipaima do asa ro angka sisean i manopot Ibana naung hehe i. Haheheon i naeng manogihon hita do laho manopot Jesus naung hehe i.

Hata “dijoloani” , dison na marlapatan do i muse : ndang na marujung di tanoman be hape partinandaan nasida tu Tuhan Jesus, alai gabe mulak ma muse tu parjumpangan nasida na parjolo uju i, ima di Galilea. Ai di huta Galilea hian do ditanda angka sisean i Tuhan Jesus, jala di huta ido parjolo sahali Jesus mamaritahon barita na uli.

Marhite na dijoloani Tuhan Jesus nasida tu Galilea, hira na mulak ma muse tu parmulaan ni ulaon ni Tuhan Jesus, jala naeng pabotohon paboa na so marhaujungan do ulaon ni Tuhan Jesus i. Haheheon ni Tuhan Jesus pataruhon na porsea tu sada partingkian na so marhaujungan, ima na sian saleleng ni lelengna rodi saleleng ni lelengna.  

Ayat 8 – 10 :

Dung sun hata ni Tuhan Jesus tu nasida mandok na joloanNa ma laho tu Galilea asa disi didapothon angka sisean i Ibana, manigor hatop do angka parompuan i laho sian tanoman i. Roha biar dohot las ni roha manggohi roha nasida marlojong asa haru hatop pabotohon angka na masa na niidana i tu angka sisean. Pangantusion ni roha biar na nidokna dison (ayat 8), ndang roha biar ala sala na niulana, manang songon angka roha biar na asing. Alai roha biar na nidokna dison, “ biar partondion” do, tarsongon biar mida Jahowa songon poda na nidok ni Raja Salomo. Mangida parlojongon na ginohan ni roha biar dohot las ni roha ni parompuan i, disi ma muse ro Jesus mandapothon nasida (ayat 9), pasahathon dameNa na sumurung i, jala taida dison tung mansai las situtu do roha ni angka parompuan di tabi ni Jesus i, pola do dihaol patNa jala manungkap tu joloNa. Parsombaon sian roha na ias jala haunduhon ni roha na marhaserepon maradophon Tuhan Jesus do na pinatudu ni angka parompuan i.

Sipahusorhusoron :

-          “Nunga hehe Jesus Kristus i,” i do pamusatan ni Barita Paskah i. I do na binege ni angka parompuan sian surusuruan i, laos i do na hinaporseaan jala na hinatindanghonnasida tu angka sisean, gabe dohot angka i manghaporseai jala manghatindanghonsa, jala laos i ma nuaeng na dipasahat tu hita asa dohot hita manghaporseai jala manghatindanghonsa.

-          Di ari parningotan dihaheheon ni Tuhan Jesus, naeng ma patubuhon sihol ni Rohanta di Tuhan Jesus, namangkorhon semangat naimbaru patupahon angka na humussus marhite pangalaho nang angka pambahenan pe, ima nagabe peleanta di Tuhan Jesus naung hehe i.

-          Haheheon ni Tuhan Jesus Kristus do na gabe hataridaan hamonangan ni Debata maralohon banua toru, ndang hamatean be ujung  ni ngolu ni angka naporsea , alai parhitean ma hamatean i laho mangeahi hangoluan na manongtong.

-          Haheheon ni Tuhanta i sian na mate, ndang tarsirang i sian haheheonta angka na porsea di Ibana. Haheheon ni Tuhanta i sian na mate, ihuthononta do muse hehe sian na mate. Tuhanta Jesus Kristus do “patumonaan” (“buah sulung”) ni angka na porsea hehe sian na mate. Mauliate ma di Tuhanta na mangalehon hamonangan on di hita marhitehite Tuhanta Jesus Kristus. Amen.