JAMITA MINGGU TRINITATIS, 03 JUNI 2012 Jesaya 6 : 1 – 8

Patujolo :

Masa do angka halumlamon di tongatonga ni bangso Israel tarlumobi ma di ngolu haporseaon uju di ngolu ni Panurirang Jesaya hatiha i. Di situasi na masa songoni, disuriranghon si Jesaya do taringot tu HABADIAON NI DEBATA, tu angka bangso Israel nang panggomgomina pe.  Adong tolu rumang ni na disoroti ni Panurirang Jesaya di parngoluon ni bangso i, :

Na parjolo ; taringot tu ngolu parugamaon na ingkon satia holan tu Debata Jahowa sambing. Na paduahon ; taringot tu ngolu sekuler na marhadomuan tu ngolu sosial dohot ekonomi naeng ma ingkon marojahan tu dalan hatigoran ni Debata. Na patoluhon ; taringot tu ngolu politik naeng ma nian manghajongjonghon paboa Debata Jahowa do Raja ni sude angka raja na di portibi on. Na tolu bidang parngoluon na ginoaran di ginjang nunga dilanggar jala dilecehkan angka panggomgomi hatiha i. Asa ido umbahen disoarahon si Jesaya asa ganup ma mangaradoti habadiaon ni JAHOWA.

JAMITA MINGGU PENTAKOSTA, 27 MEI 2012 “ ROM 8 : 22 – 27

Patujolo :

Sitaonon, parungkilon, hamaolon, ima angka panghilalaan na ingkon songgop tu partingkian ni hajolmaon. Asa ido umbahen sai didok paortibi on rura partangisan, ala ingkon do sahat parungkilon i saleleng mian dope hita di portibi on. Alai aha do na gabe hasurungan ni angka na porsea di na mamolus parungkilon na porsuk di portibi on? Marhite turpuk jamita sadarion di ari pesta hasasaor ni Tondi Parbadia, diuji do patoranghon pangulaon ni Tondi Parbadia di ngolu ni angka na manghaposi Debata molo songgop angka parungkilon.

Jamita Minggu Exaudi, 20 Mei 2012 Psalm 1 : 1 – 6

Patujolo

Psalm na marlapatan ende pujipujian tu Debata sian angka na porsea taringot tu na masa dingoluna maradophon Debata. Psalm Bindu 1 on, digoari do i : ende habisuhon. Boasa didok ende habisuhon? Ala marisihon poda laho mangajarhon dalan tu ganup jolma manang dia sipareahonna. Angka dia ma na disoarahon psalm bindu 1 on, asa didok gabe sada ende habisuhon? Idaonta ma i marhite hatorangan na adong di turpuk on.

Jamita 17 Mei 2012 ( Ari Hananaek ni Tuhan Jesus ) Epesus 1 : 15 – 23

Patujolo

Digoari do parpunguan on : parningotan di ari hananaek ni Tuhan Jesus tu banua ginjang. Parningotan na naeng paposhon rohanta paboa naung dihamonanghon Tuhan Jesus do sibolis dohot portibi on, jala manaek Ibana tu banua ginjang paradehon inganan di angka na manongtong manghaposi Ibana.

JAMITA MINGGU, 13 MEI 2012 1 JOHANNES 5 : 1 – 6

Patujolo :

Turpuk on disurathon si Johannes, tongon hatiha i tubu ganggu ni roha di torop halak Kristen hatiha i, mangadopi angka parpoda na lipe na mansoadahon hadirion ni Debata, na gabe jolma dibagasan Tuhan Jesus Kristus, boi dohonon molo di partingkian on, songon angka saksi jahowa ma aliran i, na so manjalo jala na so porsea paboa Debata marrumanghon jolma dibagasan Kristus Jesus. Asa tubu pos ni roha di halak Kristen paboa Debata do Tuhanta Jesus, umbahen na disurathon ibana turpuk on.