Epistel Minggu 25 Juni 2017, Jeremia 20 : 7 – 13

Dibagasan pardalanan ni ngolunta di hasingan on, tontu sahali hea do ra hita manghatahon manang mangulahon ruhut ruhut ni hasintongan di tonga tonga ni angka parsaoran, na mar keluarga, parkarejoan, ngolu parhuriaon, dna. Di tingki manghatahon manang mangulahon ruhut ruhut ni hasintongan i, sipata na ingkon adopanta do angka hamaolon manang abat-abat laho manghatindanghonsa. Boi masa angka na sisongoni, siala dang sai sude jolma i manghalomohon ruhut-ruhut ni hasintongan na taulahon manang na tahatahon i.

Godang do halak marsogo ni roha jala pahatahata hita molo sai tasuarahon angka ruhut-ruhut ni hasintongan i. Dohot hata na asing dohonon ma, dang na satorusna hape angka na sintong i parohon manang mampanghorhon hadengganon tu saluhut angka jolma, ai sai na ingkon adong do hape na manghagigihon jala olo sipata mangaleai angka halak siula hasintongan i.

JAMITA MINGGU 25 JUNI 2017, ROM 6 : 1 - 11

“ MANGOLU DI DEBATA DIBAGASAN KRISTUS JESUS “

Malua sian dosa i do parbue ni panobusion ni Jesus Kristus tu nasa hajolmaon. Gabe dihorhon i ma jumpang di halak na porsea i perubahan radikal jala na fundamental manghagigihon dosa. Di surat Apostel Paulus tu huria Rom di bindu 6 on, dipaandar jala ditulak si Paulus do konsep na lipe, na mandok: boi  halak na porsea i tongtong mangulahon dosa, jala na so siuhumon ibana di dosa na niulana; ala asi ni roha ni Debata di bagasan Kristus. Penyimpangan na serius do pikiran on di halak Kristen. Poda na lilu on do margoar antinomianis sian poda asi ni roha-kasih karunia, ai gabe dipansuasaehon asi ni roha i holan laho paihutihut hagiot ni dagingna.

Sasintongna halak na tutu porsea, nunga “di bagasan Kristus” en Kristo – εν κριστο ala pandidion i. Ala status “Dalam Kristus” nunga bali ibana sian gomgoman ni dosa tu hangoluan na manongtong. Halak na tutu porsea, nunga spontan sirang-dipasiding dirina sian dosa: ndang sai torus be ibana mardosai; sabalikna, molo sai tongtong dope mian di bagasan dosa, laos i ma patandahon na so tutu dope ibana porsea tu Jesus.