EPISTEL MINGGU 12 MEI 2019 Poda 15 : 1 – 9

TEMA : MANGARIRIT HATA SIDOHONON, PARBUEHON NA DENGGAN !!!

PATUJOLO

Adong do sada pandohan na mandok : “ Goar na do daina “ Ima na parjolo tubu tu rohanta molo manjaha saluhut angka hatorangan na adong di buku poda on. Buku Poda on marisihon angka poda na uli jala na mansai arga. Didok nauli ala mangajarhon taringot tu ngolu na dumenggan maradophon dongan jolma tarlumobi maradophon Debata. Didok na naarga, ala tung mansai maol do dapot hita poda on di ngolu ni hajolmaon dibagasan partingkian hatiha on, asa holan sian halak na mian di Debata do boi dapot poda si songon on. Dihaporseai sandok huria do, paboa raja Salomo do haroroan ni angka hatorangan na adong di buku Poda on. Raja Salomo ima, sahalak na pistar, na bisuk jala na mabiar mida Jahowa.

JAMITA MINGGU 12 MEI 2019 JOHANNES 15 : 1 – 8

“ MIAN JALA MARPARBUE DIBAGASAN JESUS “

PATUJOLO

Hau anggur nang parbuena somal do i ingkon adong di tongatonga ulaon na pinamasa di halak Israel uju i sahat ro di tingkion. ragam do hinaringkot ni anggur i, isarana dipangke do i gabe pelean siinumon (2 Musa 29:40), alai sai dipaholang angka malim do i hatiha laho bongot tu undungundung/panghobasion (3 Musa 10:9). Na boi muse do Anggur i mandaoni sahit na ngalian  manang daon ni butuha songon tinonahon ni si Paulus tu si Timoteus (1 Tim. 5:23).