Jamita Minggu 05 Agustus 2012, Johannes 6 : 24 - 35,

Patujolo :

Molo adong sada sungkun sungkun, aha do na gabe tolak ukur ni hasonangan di partingkian nuaeng on?, ra manigor mura do alusanta i. Torop do halak di partingkian on na mangarajumi, ia ukuran ni hasonangan ima : Sipanganon dohot arta portibi. Loja do jolma mula ulaon holan asa dapot na pasonanghon roha i. jala sipata olo do gabe tading angka na asing hinorhon ni na lalap mangalului arta portibi i. Adong do pandohan ni halak Batak na mandok : “Mutu do siborok mangalului guluan, mutu do jolma mangalului hangoluan.” Dipadutudhon pandohan i do manang songon dia pingkiran ni halak hita taringot tu parngoluon on.
Na arga situtu do ngolu i. Ala ni argana, rade do toropan halak loja mangusahohon. Diadangi tusan dohot tu sadui, digogo mangula dohot mansari arian sahat ro di borngin asa tung unang nian asal mangolu, alai naeng ma dapotan ngolu na tama. Alai ngolu na na nidokna disi, tontu  ngolu pardagingon do na dimaksud disi. Hinorhon ni hasonangan portibi parsatongkinan i, gabe lalap do jolma di tujuan akhir ni angka na porsea, ima hasonangan na manongtong i. Asa ido na jinamitahon ni Tuhan Jesus tu angka natorop di bagasan turpuk on.

Hatorangan :

Latar belakang manang na gabe sibonsiri ni turpuk on ima : halongangan na pinatupa ni Tuhan Jesus na manamuei  torop halak na marbilangan hurang lobi 5000 halak marhite lima roti dohot dua dengke. Halongangan na pinatupa ni Tuhan Jesus i huroha gabe manait roha ni natorop na marnida jala na umbotosa hatiha i. Gabe tubu ma pemikiran di natorop i, paboa na boi do Jesus paradehon hasonangan na instan di nasida marhite na parade sipanganonna.  Asa ido umbahen na dilului nasida Jesus, boi dohonon ndada ala na nionjar ni haporseaon, alai sipanganon pardagingon manang hasonangan portibi do na niluluan ni natorop i. 

Marnida giot ni roha ni natorop i, diuji Jesus do pasintonghon ojahan na sintong  taringot tu parngoluon on.  Dipaorot Tuhan Jesus do pingkirannasida sian na manghalungunhon roti tu na manghaporseai Ibana. Dung dipatorang Tuhan Jesus ojahan na sintong tu angka natorop i, ndang manigor tubu haporseaon di nasida, gariada naeng ujionna do Tuhan Jesus patuduhon tanda di nasida. Sian on ma taida paboa na hurang dope huroha tanda halongangan na pinatupa ni Tuhan Jesus di topi tao Tiberias i. Ai pangidoanna naeng ma nian bahenon ni Tuhan Jesus muse tanda halongangan songon na masa uju di parhorsihan dope ompu nasida uju i.

Dipatingkos Jesus ma dison pangantusion nasida i, dipabotohon Jesus tu nasida di ayat 32, ai ndada si Musa na mangalehon manna uju i, alai tung Debata do na mangalehonsa. Holan ulaula manang parhitean do si Musa na patupahonsa. Jala dipatupa pe manna i tu angka ompu nasida hatiha i, ndang jaminan gabe sai tong bosuran nasida uju i. na marlapatan nang pe dipangan manna i, alai dung sadia leleng muse rapar do na manganghon i.

Alai anggo roti hangoluan na nidok ni Jesus dison, Ibana sandiri do i. Ido umbahen didok di ayat 35 pangujungi ni turpuk on, : “  Ahu do roti hangoluan i: sandok na so male be manang ise, naung ro tu Ahu; jala na so tupa be mauas manang ise, na porsea di Ahu “. Na naeng ondolhonon ni Tuhan Jesus disi, tongtong do bosuran, na so tupa be male manang mauas nasa na olo manjanghon roti hangoluan i, ima diriNa sandiri.

Asa marhite angka hatorangan ni Tuhan Jesus di turpuk on, denggan ma molo tapeop ayat 27 na mandok : “Unang ma sipanganon na olo salpu ula hamu; alai sipanganon na mian ro di hangoluan na salelenglelengna, na naeng lehonon ni Anak ni jolma i tu hamu. Ai Ibana do dihatindangkon Ama i, Debata “. Mansai ringkot do i hangoluhononta di partingkian nuaeng on. Ai torop dope angka jolma hatiha on, na pasuda tingki, gogo dohot ngoluna holan laho mangalului “manna” sambing.  Manna dison tudos ni sipanganon manang hasonangan portibi).

Nian mansai ringkot do sipanganon portibi on, ai haporluan na utama do i di ngolu pardagingon, na boi do manghorhon hasusaan angka na so boi mamparsaulihon sipanganon portibi, isarani angka na raparon hinorhon ni na so adong sipanganon. Jala ndang na gabe mandok asa unang pola luluan be haporluan ni pardagingonta. Alai na nidokna dison, ringkot pe sipanganon portibi on, alai dao dope rumingkot sipanganon partondion i. Ai molo tapangan sipanganon pardagingon laho pangoluhon dagingta do I, jala molo pe tapangan sipanganon partondion, laho pangoluhon partondionta do i. Alani, na rap ringkot do duansa, alai rumingkot ma sipanganon partondion i.

Holan on, boha do asa boi taruli hita di sipanganon partondion i?. Tuhan Jesus mandok, manang ise na olo ro tu Ahu, manang ise na porsea di Ahu.

Hubahen ma jo sada tudosan, alani sipanganon na boha do umbahen na boi hita margogo jala marhahipason? Alus tu sungkun sungkun i, ra dohonta ma, alani sipanganon na tabo, manang alani sipanganon na bergizi, manang alani sipanganon na godang. Na boi do tarjalo roha angka alus i. Alai anggo apala alus na sumintong, “ Boi pe hita margogo jala marhahipason alani sipanganon na tapangan do “. Na marlapatan, godang pe sipanganon I, tabo pe sipanganon i, bergizi pe sipanganon i, alai anggo so tapangan do sipanganon i, ndang boi mangalean gogo i dihita. Ndang gabe hangoluan sipanganon i anggo so tapangan.

Asa songoni ma tudosan ni turpuk on, tung manang na boha pe godang dohot suksuk ni pasupasu, haimbaruon dohot hasonangan na pinarade ni Tuhan Jesus ; tung manang na boha pe hinatimbo ni haluaon dohot hangoluan na di bagasan Jesus i, tung so gabe hangoluan Ibana di hita anggo so ‘tapangan’ do Ibana, lapatanna ndang tahaporseai jala taparsaorhon. Alai molo tajangkon do Ibana, tahaporseai jala taparsaorhon, suksuk do haluaon dohot hangoluanta. Ndang male be hita, ndang be mauas, lapatanna dapotan hasesaan, haimbaruon dohot hadameon.

Panimpuli :

Haposi jala haporseai ma Jesus na gabe Roti hangoluan na ro sian banua ginjang. Ai Ibana do mangalehon hangoluan na manongtong. Na boi mansohot do angka hasonangan portibi on, alai anggo hasonangan na pinarbagaNa tu hita, tung na so tupa do i mansohot alai manongtong sahat ro di salelenglelengna. Taruli do hita disi, asal ma “tapangan” roti hangoluan i.