Bahan Jamita Minggu, III Set Trinitatis ; 24 Juni 2012, “ Job 38: 1 – 11”

 Patujolo

Tu angka ise do bongot parungkilon manang sitaonon?” Alus na jempek tu sungkun sungkun i dohonon ma “ganup jolma”. Na marlapatan, halak na daulat manang na jahat, tong do hape mangadopi parungkilon manang sitaonon. Halak na marminggu, manang na so hea marminggu tong do ingkon mangadopi parungkilon.

Molo songon i, aha do hasurungan ni na burju manang na daulat molo tong do marungkil manang marsitaonon di ngoluna?

Hatorangan

Ayat 1 – 3,

Dipatorang dison parhitean ni Jahowa na ro tu si Job marhite sian hababa manghatahon hata-Na. Jala dibuhai do hata i marhite  sungkun sungkun. Sada sungkun sungkun na padimposhon roha ni si Job taringot tu huaso dohot hinagogo ni Debata. Di ayat 3, mansai tangkas do dipabotohon haradehon ni si Job laho mangalusi sungkunsungkun na naeng sinungkun ni Jahowa tu ibana. Hata mangajari di ayat 3 on, dang marlapatan si Job gabe guru, alai adong di si sada tuntutan paboahon taringot tu sungkunsungkun na disungkun Jahowa tu ibana.

Ayat 4 – 7

Sepintas idaonta dison sikap ni Jahowa na “menantang” si Job taringot tu parbinotoan na adong di ibana. Jala dison ma patar, ia habisuhon ni jolma tung na so boi do manimbangi angka na binahen ni Jahowa tu jolma. Laos di ayat 5-7, dimulai Jahowa ma sian ulaonna na manompa jala na mangatur angka na niulana. Tung so hea do Jahowa manjalo panuturion manang gogo sian jolma i. Tung songon dia pe timbo ni parbinotoan ni jolma taringot portibi on, tung so boi do i gabe sada suhat suhat tu ulaon ni Jahowa.

Ayat 8-10,

Dipaandar dison hagogoon ni Jahowa na mangatasi sandok na tinompa-Na. Laut dipangantusion ni teologi PL (Padan na Robi) martudutudu tu hagogoon ni portibi on, jala boi do laut pangoluhon laos pamatehon jolma i. Na marlapatan hagogoon sian portibi on, tong do di toru ni huaso ni Jahowa. Molo taida ayat 9, hata “ombun” di teologi Padan Na Robi (PL) marlapatan do i hamuliaon dohot hasangapon. Berarti, sian Jahowa do haroro ni hamuliaon dohot hasangapon. Jala di ayat 10, Jahowa do na mambuhul angka na binahenna. Sude na i, marlapatan, tung Jahowa sandiri do na patupahon angka na uli dohot na singkop di ganup parngoluan ni jolma..

Ayat 11,

Angka galumbang dison marlapatan jala na martudutudu do i tu nampuna hagogoon. Boi do galumbang i mambahen mate jolma. Di ayat 11 mansai tangkas, ia galumbang pe unduk do maradaphon Jahowa. Molo songon i, aha ma sipangasahon manang ulaon dia do na boi sipangasahon maradaphon Jahowa? Tung na so tolap do angka ulaon ni jolma manang habisuhon ni jolma laho sipatudohon tu ulaon ni manang huaso ni Jahowa? Molo songon i do hape, nang pe dibagasan parungkilon manang sitaonon na dokdok jolma i, unang ma mangasahon ulaonna na denggan maradophon Jahowa.           

Sipahusorhusoron

-          Ndang hea Jahowa patupahon sitaonon manang parungkilon. Alai dipaloas Jahowa do sitaonon manang parungkilon ni songgop tu jolma. Parungkilon manang sitaonon boi do marlapatan tu uhum ni Jahowa. Alai unang holan sebatas tu pangantusion si songon i. sitaonon manang parungkilon boi do dalan ni Jahowa laho patandahon dohot papatarhon pangurupion dohot pandonganion-Na tu ganup na tinompa-Na. Laos i ma na patubuhon hasatiaon di haporseaonna nang pe mansai dokdok sitaononna i. Jala halak na satia dibagasan haporseaonna, taruli do dua hali lipat ganda sian na jinalo na hian, molo nunga jumpang tingki na denggan na pinatupa ni Jahowa.

-          Na boi do ganup jolma tarlumobi halak Kristen na sai olo meoleol haporseaonna molo songgop sitaonon manang parungkilon di ngoluna. Jotjot do mandok, “didia do Jahowa, nunga torop angka ulaon na denggan naung huula, ringgas do au martangiang huhut marminggu, alai boasa ma sai tong au marungkil di ngolu on?” Marhite turpuk on, tangkas dipabotohon, ia Jahowa na tahaporseai marhite Jesus Kristus jala na mangaramoti parngoluanta marhite Tondi-Na na badia, ima Debata na pargogo na so hatudosan. Tung so hea do Ibana manadinghon jolma na tinompa-Na i punjung manaon angka sitaonon i. Molo nunga dapot tingkina, dapot ma parbue ni hasatiaon i, dua hali marlipat ganda. Jahowa ma na mandongni hita ganup ari ganup taon, tumpahanNa do langkangta urupanNa do hita manaon.  Amen.