Jamita Minggu 10 Juni 2012, 2 Korint 4 : 16 – 18

Patujolo :

Mangihuthon sejarah, hira taon 50-an dung Kristus do ditongos Apostel Paulus suratna na paduahon manopot ruas ni huria na adong di luat Korintus. Molo sian parsagi ni buku on, tarlumobi ma bindu 4 na gabe turpuk jamita on, tarsagi do i tu dua ponggol.

Na parjolo ; Ayat 1 – 6 : Kesaksian manang sada panindangion ni si Paulus taringot tu parsitutuonna mangulahon tohonanna songon sada parbarita nauli, nang pe ingkon bolusonna angka hamaolon.

Na paduahon ; Ayat 7 – 18 : Sada panindangion taringot tu haradeon ni rohana marsitaonon hinorhon ni barita nauli, jala ndang biahaton mangadopi angka abat abat na sonson di jolona. Asa ido na naeng idaonta muse di angka hatorangan ni turpuk on.

Hatorangan

Û    TOGU NI ROHA (ayat 16 – 17)

Dua hadirion na andul marasing dipatorang Apostel Paulus di pamuhai ni turpuk on, ima : “ Pamatang lam surut “, dohot “ Partondion lam matoras/togu”. Adong do togu ni roha ni apostel i dison, nang pe lam buruk pamatangna, nang pe lam moru gogo secara fisik manang hadagingon, alai ndang olo ibana manundati ulaonna hinorhon ni pangidoan ni daging na so manongtong i. Ndang gabe sada penghalang di ibana haburukon ni pamatang, baliksa tahe lam marsigorgor do partondionna marbarita nauli. Nang pe ingkon adopanna angka hamaolon, torang do di rohana, na so manongtong sitaonon nang haporsuhon na tongon diae ibana. Adong do togu ni roha di ibana, ido umbahen adong pos ni roha jala pangarajumion di rohana paboa ndang tarbahen sitaonon nang haporsuhon i gabe mangago tondi ni jolma. Baliksa tahe songon na tarsurat di Jesaya 42 : 3 ido panghirimonna, (Arung naung marosahi, ndang laos ponggolhononNa, jala sumbu na marnehetnehet i, ndnag laos intopan). TOGU NI ROHA do na pinatuduhon ni Apostel Paulus dison.

Û    MARBONA TU HATONGTONGON (Ayat 18)

Sikap na paduahon na adong disi Paulus asing ni “togu ni roha”, ima “hatongtongon”. Marbonahon na manongtong do na manggohi pamingkirionna. Torang do dirohana, paboa di ujungna sogot, hatongtongon ido na ingkon patar. Ia tung pe tarida angka na tarida nuaeng on, alai martingki be do gogona i. Tung na so tarbahen do hot jongjong angka na tarida i, ido umbahen na marguru jala marbona tu na manongtong i Apostel Paulus dison.  

Nunga gabe sada bangko ni hajolmaon marguru tu angka na niida ni mata. Na deba maradu marsiadu jagar do jolma di ngoluna. Marsiadu do angka jolma nuaeng mampareahi angka na tarida i, ima angka bangko bangko hadagingon. Pola do sampe dihalojahon arian nang borngin marsiadu di angka na tarida i. Alai sasintongna, na so haru sadar do jolma nuaeng on, nang pe sagodang godangna dapot angka na tarida i, manang angka na di portibi on, gabe magopo do i muse saluhutna sogot di tingkina. Ujungna angka na jagar i gabe jagar idaon sambing nama molo dung magopo saluhutna. Ai ndang adong na taboan tu portibi on, jala ndang adong na laho boanonta sogot sian portibi on tung sadia godang pea dong di hita angka na tarida i.

Asa ringkot ma marguru hita tu Apostel Paulus dison, lam tahaposi ma paboa Debata do alpha dohot omega, Ibana do bonana dohot ujungna. Molo adong roha na marbona tu hatongtongon songon si Paulus dison, laos gabe ido bona ni gogonta mamolus angka na masa di parngoluonta.  

Sipahusorhusoron 

Ndang tarbahen hita so jumpanganta angka na dokdok hinorhon ni parsihohotanta mangihuthon Kristus. Adong do manang na piga gombaran ni hatauon ni jolma mangadopi angka na suhar di ngoluna.

Parjolo, manigor marungut-ungut. Somalna tu angka na sai berpikiran negatif do on masa, (negative thinking), angka na pesimis, hira na so margogo be dihilala Tondi ni Debata mangurupi.

Paduahon, margudompong manang menyerah tu keadaan na masa dijolona. Ndang adong inisiatif mangido gogo sian Debata.

Patoluhon, manjanghon na sorat i dibagasan pos ni roha. Tau ibana mamorsan na dokdok i ala adong panghirimon dohot pos ni roha paboa na so pasombuon ni Debata punjung so mardongan mangadopi na sorat i. (laos boi do muse tabandinghon tu catatan na hubahen hami di blog on di bagian na berjudul “empat sikap manusia dalam menghadapi pergumulan hidupnya”. Boi do tajaha i di blog on).

Panghirimon do patubu habengeton, habengeton ma muse patubu gogo, molo dung mian gogo i, adong ma haradeon manjalo sude angka na masa di ngoluna. Na ingkon marsihohot do hita mamolus na tarida i, ai parsatongkinan do saluhutna i, dung i soluk ma muse tu hit alas ni roha na manongtong.

Huhut ma taingot, na patulushon ulaon ni Debata do hita molo marsitaonon ala ni goarNa, jala ndang boi so dapotan hinaulina hita, ima hasonangan na manongtong i. Amen.