Ingkon Pasangaponmu natorasmu

Adong ma sahalak baoa na margoar si Lambok, tung mansai burju do ibana jala nunga tung denggan ngoluna di pangarantoanna.
Di nasahali marpingkir ma ibana, ingkon hubalos jolo angka na denggan sude naung pinatupa ni natua-tuangku tu ahu ninna rohana.
Ditonahon ma natua-tuana sian huta laos ditongos ma ongkos pesawatna asa ro nasida mandapothon ianakhonna dohot parumaenna suang songoni nang pahompuna.
Ro ma tutu natua-tuana sian huta mandapothon ibana tu Jakarta, tung mansai las rohana.
Bodarina i diboan ibana ma natua-tuana i mardalani tu mall dohot mangan tu restoran mewah na adong di Jakarta, laos di na mangan i nasida disungkun ibana ma natua-tuana na dua i:
“Aha do bahenonhu bapa/oma asa boi hubalos naung binahenmuna tu ahu?”
Alai sip do natua-tuanai, dang pola dialusi holan mengkel suping do nasida huhut songon na marpingkir.

Dungi mulak ma nasida tu jabu, jala saborngin i sai manetek ma ilu ni natua-tuana, alai huhut do huroa diparrohahon parumaenna i nasida.
Disungkun parumaenna i ma tu amantana, ninna ma:
“Ai boasa holan na manetek ilu ni inong i, pa?, mulai mulak sian restoran i hita songon na asing do huida natua-tua i?”
Pintor didapothon si Lambok ma natua-tuana i, jala disungkun aha do alana umbahen songoni lungun ni roha nasida.
Dungi didok natua-tuana i ma tu si Lambok :
“Molo sungkun-sungkunmu si nabodari i do anaha, on ma alusna…” ninna huhut ma songon na ditarik hosana jala didok muse :
“Anggo angka na denggan naung hubahen hami dang na tarbalos ho i amang, ai sian na manubuhon ho, mangaramoti ho di sihaetehonmu, dohot pagodang-godanghon ho, nunga tung godang na hupatupa hami”
Pintor tarjolma ma si Lambok, dungi tangis ma ibana tarilu-ilu ai tung toho do na nidok ni natua-tuana i.
Songoni ma nang hita sudena, dang na tarbaloshon hita angka na denggan naung binahen ni natorasta be tu hita, holan na boi tarbahen hita ba taramoti ma angka natua-tuanta di sihatuaonna, tabahen ma tutu angka si las ni roha, unang be sai taarsahi nasida.