Patujolo :
Lam tangkang do pangalaho ni bangso i diida
panurirang Jeremia ,tarmasuk angka parhuaso dohot malim. Gogo do dipinsang si
Jeremia nasida asa muba. Molo ndang muba,paloason ni Debata ma halak parbegu
mangago nasida dohot mangalengsehon huta Jerusalem. Alani i gabe ingkon manaon
na hansit si Jeremia ; dipungkuli, dirante, dihurungkon, didabu tu godung
na bagas na gok gambo. Tutu ma antong, ndang sadia leleng nari, ro ma harajaon
Babel mangalotloti Jerusalem. Torop sian bangso i ditaban tu Babel, alai ianggo
angka warga partoru na so margellok ditebahon do. Sanga do si Jeremia dirante , alai gabe dipalua komandan Babel i do muse ibana tading
di Jerusalem.
Hatorangan
:
Ayat 22 –
26
Ingkon jahaonta do angka hatorangan na adong di jolo ni turpuk
on mamungka sian ayat 1, asa tangkas berengonta sibonsiri ni turpuk on, di na mangangguhi
si Jeremia mangandungkon hinamago ni bangso i dohot huta Jerusalem
(Bagasjoro) naung magargar, maloha i. Bangso na tarbarita na jolo jala disegani
bangso na humaliang, nuaeng gabe marlea. Aha ma na boi tardok si Jeremia so holan
mangarsakhon huhut mangalualu tu Debata. Godang do ditaon ibana na dangol, pangaleleon , raru dohot rasun ala
manoarahon hasintongan ni Debata holan asa unang sanga lalu rimas ni Debata na
dokdok i. Nang pe songon i, ndang gabe hansit rohana manang mandele, dipasahat
do tu Debata asa sai dipaingotingot Debata ibana di parungkilonna i marhite na
apulan, pargogoan, donganan ni Debata
ibana ganup tingki, dungi gabe sabam ma rohana di bagasan manaon sasudena i. Hasabamon
ni rohana i, ndang hasabamon na passip (ngongong), hasabamon na aktip na marpangkirimon
do. Lapatanna, atik pe mansai porsuk jala dangol diae ibana dohot bangsona, mangkirim
do ibana na pasti adong perubahan patupaon ni Debata di ari na naeng ro. Mamereng sian hajahaton dohot roa ni
pangalaho ni bangso i, uhuman na hombar do na mangonai tu nasida na boi
mambahen sun siap (sirna ) nasida. Hape tumimbo do asiasi ni Debata Jahowa
mangatasi murukNa. Ido umbaen didok si Jeremia : Asiasi ni Jahowa sambing jala
na so marpansohotan i do na manganju jala paloashon nasida mangolu (ay.22). Molo
muruk pe Debata rupani di ari on, alai marsogotna i mulak rata do asi ni
rohaNa. I ma hadirion, bangko/sifat dasar ni Debata na murni, na ias jala na
gok habonaron i (ay.23). Dibahen i ma umbaen las roha ni panurirang i, mangongkuhon
dibagasan tondina : Debata do parjambaranna dohot pos ni rohana. Lapatanna, tindakan
dohot perbuatan ni Debata na mangonai tu bangsoNa pasti mardalan dibagasan asi
dohot holong ni rohaNa (ay.24). Ndang dendam na mambahen hamagoan/hasisiap ni
bangsoNa. Alani i ma dijouhon panurirang on tu ganup jolma asa marhaposan tu
Debata, marsitutu sian nasa roha dohot tondina mangalului Debata jala burju
mangkalungunhon hatuaonNa. Taruli ma i di denggan basa dohot tua sian Debata
(ay.25-26).
Ayat 27-30
Panghirimon tu
Debata sadalan do i dohot hasatiaon, hasabaron, dohot pasahathon ngolu na hibul
tu pandonganion ni Debata. Parungkilon nang sitaonon ndada na gabe ujung ni
parngoluon ni jolma i, nang pe idaon songon na diloas Debata hona uhum jolma i,
alai ndang olo Tuhan i mangambolongkon halak ro di salelenglelengna (ayat 31).
Sasintongna, dibalik ni angka sitaonon manang hasusaan i, dipatuduhon Debata do
roha na marpangulahi hombar tu hinagodang ni asi ni rohaNa (ay32). Molo pe
sipata songon na diloas Debata marsitaonon jolma i, alai sasintongna ndada sian lomo ni rohaNA
Ibana pasipalhon manang mangarsahi jolma manisia i (ayat 33).
Sipahusorhusoron :
- Molo masa angka sitaonon, unang ma holan tu sitaonon i tartuju rohanta, alai naeng ma adong pangarimangion, aha do tujuan ni Debata umbahen na pola diloas sitaonon i songgop tu ngolunta. Marhite roha na olo songoni do tarbahen hita pasauthon lomo ni roha ni Debata masa di ngolunta.
- Debata na manongtong do Ibana, diuhum pe jolma i laos ihut do diungkap pintu di angka na olo marhamubaon, asa unang bagas madabu tu gambolisop ni dosa.
- Molo manongtong do Ibana di hataNa, nang hit ape antong denggan do manongtong manghirim jala manghalungunhon pangurupionNa. Amen.
Tidak ada komentar:
Posting Komentar