Jamita Minggu 02 Februari 2020 - Mateus 5 : 1 - 12

HALAK NA MARTUA MANGIHUTHON JESUS

Sude do jolma na di portibion manghirim, managam, dohot mangalului jala mula ulaon asa anggiat denggan parngoluonna, jala dapotan hatuaon. Pola do loja jolmai marpingkir, mangalehon nasa gogona asalma dapot nasida na pinarsinta ni rohana asalma boi martua parngoluonna.

Martua molo di hata Indonesia didok berbahagia. Somalna halak na martua mangihuthon parnidaan ni portibi on ima, molo las rohana, sonang ngoluna, godang artana, torop pinomparna, jala sangap di jolo ni halak. Dungi nambura dapotan silehonlehon, nambura mangoli/muli somal do didok martua, na marulang taon, na mamasuhi bagas, naung sorang anakhon/ paabing pahompu, naung ditodo gabe calon sintua dohot manjalo tohonan sintua (Parhalado partohonan), dna. Sandok, suhatsuhat ni hatuaon mangihuthon parnidaan ni portibi on ima, hasonangan, ndang parungkilon. Tontu, ndang denggan jala ndang maradat molo didok ’Martua ho ala dapotan parungkilon’; martua ho ala gok sahitmu, manang martua ho ala marpogos’, dna. 

Tema minggu sadarion di bahasa Indonesia didok : “ Orang yang berbahagia menurut Yesus “. Molo di bahasa Batak didok ma tema i : “ HALAK NA MARTUA DI JESUS “.

Turpuk on ima jamita na pinasahat ni Tuhan Jesus, na jotjot didok “ JAMITA DI DOLOK “ ( Khotbah di bukit).

Molo didok di Tema Minggu sadarion, “ Halak na martua di Jesus “, antong mangihuthon parnidaan ni Tuhanta Jesus, aha do sasintongna suhatsuhat ni hatuaon i? Mangihuthon parnidaan ni portibi on nangkin didok, ia suhatsuhatni halak namartua , ima hasonangan. Isarana molo denggan parngoluonna, gok sinamot manang arta, torop parngoluonna, denggan angka ianakhonna, jala jolma na terpandang di humaliangna. Jala on do  filosofi parngoluon ni hita Batak, Hamoraon, Hasangapon, Hagabeon. Angka on do na somal gabe suhat-suhat ni halak na martua manang na berbahagia. Jala angka on do na pinatupa portibion. Hape sasintongna manang hasangapon,  hamoraon dohot hagabeon ni ndang menjamin mambahen ngolu ni jolma i gabe martua manang “berbahagia”. Antong diangka halak na songon dia do na targoar halak na martua ? 

1.       Martua ma na pogos tondi, ai di nasida do harajaon banua ginjang i! (Ayat 3)

Sangombas idaon hira na maralo do on, Alana sai jotjot do diondolhon asa gabe mamora hita di partondion, ai ido mual ni angka las ni roha. Alai dison didok, justru halak na pogos tondi do na martua. Antong aha do lapatanna molo didok martua ma na pogos tondi ? Halak na pogos tondi na nidokna dison : ima halak na manghilala na pogos, na gale manang na so margellok diadopan ni Tuhan i. Manang boi dohonon halak na sai tongtong marsigantung tu Tuhan siala dirajumi na gumogo jala na ummora di parbinotoan do anggo Tuhanta i. Halak na pogos tondi, i ma angka na mananda dosana dohot haporluan nasida. Diboto do na so tarbahen nasida manang aha na denggan ianggo holan sian gogo nasida sandiri. Dihasiholi nasida do pangurupion na sian Debata

2.      Martua ma na marsak roha, ai siapulon do nasida! ( Ayat 4 )

Nasa namangolu ingkon do hea manghilala arsak ni roha dingoluna. Ndang tarjua hita i masa dingolunta on. Asa molo ingkon adopanta do i, gogo laho mangadopi arsak ido saintongna na gabe sipingkiranta. Aha manang ise do na boi mangalehon gogo uju marsak hita? Tontu songon halak na porsea, dohononta ma paboa holan Tuhan ido na tuk mangalean gogo di hita. Asa ido didok Tuhan i di ayat 4 on, martua ma na marsak roha,, boasa martua ? Alana apulon ni Tuhan ido nasida di sitaonon/arsak ni roha i.

Asa dohononta ma nian, unang pangido asa unang ro galumbang i, ala ingkon do ro i. Alai pangido ma gogo sian Tuhan i laho mangadopi galumbang. Jala molo diparbaga Tuhan i dison na ingkon apulanNa do na marsak, ima antong na gabe hatuaon dihita jolma angka na hinonghopNa.

3.      Martua ma na lambok roha, ai teanonnasida do tano on! ( Ayat 5 )

Saurdot ma pandohan ni Tuhan Jesus dison dohot na didok parpsalmen di Psalmen 37 : 11  “Alai sai na teanon ni angka parlambohi do sogot tano i, jala hahilashononna hinadeak ni hadameon”. Tung halambokon i do tutu na boi manghamonanghon mansai torop jolma gabe pangihut ni Kristus, jala asa tongtong nasida hot di haporseaon, panghirimon dohot haholongon pinodahon ni Tuhan i.

4.      Martua ma na mauas male mida hatigoran, ai sipabosuron do nasida! (Ayat 6 )

Halak na maus male mida hatigoran, i ma angka halak na sai lomo rohana mangulahon na tigor, jala manghagigihon angka na so tigor dingoluna.  Mauas male mida hatigoran, ima roha na marpangoloion tu patik ni Debata; ai dibagasan patik i do dapot aturan ni hatigoran. Didok Bibel i do di Psalmen 119:172 “ Sai tariashonon ni dilangku do bagabagami, ai hatigoran do angka tonami saluhutna”. Asa boi ma antong dohonon : halak na mauas male di hatigoran do molo sude pingkiran, hata, dohot parulanta i tudos tu haadongon ni Kristus. 

5.       Martua ma na asi roha, ai siasian do nasida! (Ayat 7 )

Ia na marasi ni roha, i ma na mangurupi halak na tama jaloon nasida. Songon i do dibahen Debata tu hita. Molo manghilala do hita naung diingot Debata asi ni rohaNa tu hita nasailaon, mansai uli do tong molo mangolu hita pangkeonNa gabe ulaulaNa patupa asi ni rohaNa tu angka donganta na mangharingkothonsa.

6.      Martua ma parroha na ias, ai idaonasida do Debata! ( Ayat 8 )

Gabe parroha na ias, on ma sada na pinangido ni Raja Daud songon na tarsurat di Psalmen 51 : 12 “ Tompa ma roha na ias di bagasan ahu, ale Debata, jala paimbaru ma tondi na marsihohot di bagasan ahu “. Parroha na ias ima parrohaon na bulus, molo di hata Indonesia didok ma i, “ Hidup yang apa adanya “ bukan “ Hidup yang ada apanya “. Dang parulaon marpambuat manang ngolu na bersandiwara, jala ndang hata na mangait tu ngadol, sandok roha na bulus mangeahi na dumenggan. 

7.      Martua ma sibahen dame, ai goaron do nasida anak ni Debata! ( Ayat 9 )

Hadameon manggombarhon panghilalaan na sonang, tabo, denggan, ture, dame, atur dohot angka lan na asing na mambahen panghilalaan marlas ni roha. Di bagasan hadameon ndang be jumpang angka na masitihaan, pangiburuon, panenganengaon, paburnang diri, manarihon dirina sandiri, pangkilalaan na gumogo sian dongan, lea mida dongan, dna. Siala ni i do di tiroi hata ni Debata on hita, asa taeahi ma hadameon i. Gabe si eahi hadameon ma hita di tongatonga ni bagasta, luatta, ulaonta, parsaoranta, punguan marganta, tarlumobi ma di tongatonga ni hurianta, nang songon i di tonga ni bangsonta. Didok Jesus do tu hita: ‘Martua ma sibahen dame, ai goaron do nasida anak ni Debata! 

8.    Martua ma na pinaburuburu ni halak ala ni hatigoran, ai di nasida do harajaon banua ginjang i! Martua ma hamu, molo diinsahi halak hamu manang dipaburuburu manang dipatubutubu ragam ni hata na roa, na so tutu, dompak hamu ala ni Ahu! ( Ayat 10-11)

Diboto Kristus do na torop sian angka siseanNa i ingkon dabuonna muse tubagasan hurungan, jala deba sian nasida bunuon ala ni goarNa. Alai dipaboa Ibana hian do asa unang marsak roha nasida ala ni i. Tung so adong na boi mambahen mara tu halak na mangkaholongi dohot na mangihuthon Kristus. Sai na rap do Ibana dohot nasida manang didia pe. Tung pe dibunu pe nasida, lehononNa do muse tu nasida sada ngolu na so boi marujung dohot sada tumpal na so olo sega. Asa laos on ma gabe gogo dihita, molo diinsahi hala dipahatahata jolma hita alani hatigoran, martua ma hita disi, ai teanonta ma harajaon banua ginjang i. Jala taingot ma, nunga sian na robi masa i, nunga sian najolo dipaburuburu angka Panurirang nang angka na sinuru ni Debata laho mangulahon hatigoran i ( Ayat 12 ). 

Antong rap taeahi ma ngolu na martua dibagasan Jesus i, ndang na mandok na so ringkot eahan suhatsuhat ni hatuaon na di portibi on. Ai suhatsuhat ni hatuaon na di portibi on ringkot do i dingolu pardagingon saleleng mangolu dope hita. Alai ingkon adong ma na gabe skala prioritas dihita, aha do na rumingkot dihita? Hatuaon portibion do ? manang hatuaon di Tuhanta Jesus? Antong naeng ma nian tading na ringkot i dibahen na rumingkot i. Amen.