Hesekiel
36:26
Jala
lehononku tu hamu roha na imbaru dohot tondi na imbaru tu bagasan ateatemuna;
jala unsatonku do roha batu sian dagingmuna, jala lehononku tu hamu roha sibuk.
Di bona ni taon 1970, adong ma
sahalak teroris na mansai malo mamangke sinjata na margoar Roger Arienda. Disangkapi
ibana ma hatiha i rap dohot donganna laho mangagohon hosa ni Presiden Filipina
uju i, ima na margoar Ferdinand Marcos. Alai songon hata ni Tuhanta na mandok :
“ roha ni jolma marsangkap dalanna, Debata patontuhon langkana “, sundat do
tahi na jat na di roha nasida i. Habotoan ma sangkap nasida andorang so
diulahon dope, pola do ingkon tarhurung ibana saleleng 12 taon hinorhon ni
tahina na jat i. Di taon parjolo na tarhurung i ibana, lam marsigorgor ma sogo
ni rohana maradophon si Ferdinand Marcos
jala lohot ma tu rohana, ia dung ruar annon sian hurungan ingkon pamateonna do
si Marcos i.
Di taon na patoluhon uju di
hurungan ibana, tarbereng ni ibana ma sada buku marbungkus na rara. Tubu ma tu
rohana, sotung do buku na rara ni si Mao Zedong (Uluan Komunis China) i, dibuat
ibana ma buku i alai jut ma rohana dung dijaha, ai Bibel do hape buku na rara
i. Dimulana i naeng do diambolongkon ibana Bibel i, alai tubu ma tu rohana aha
do isi ni buku i laos gabe dijaha ibana ma.
Dijaha ibana ma Bibel jala so
pamotoanna mangula ma Tondi Parbadia mangunsat roha batu na mian dibagasan
hadirionna. Mamungka sian i, marsinggang ma ibana jala diungkap ma rohana
manjanghon Kristus i. Jala mansai balga do panghorhonna di ngoluna, muba ma rohana
sian roha batu gabe roha sibuk.
Songgot ma antong roha ni angka
jolma na tongon tarhurung rap dohot ibana hatiha i mangida hamubaon na masa di
hadirion ni Roger Arienda i. Jala diudut ni ngoluna, gabe parbarita nauli ma
ibana di hurungan i tu angka donganna na rap tarhurung dohot ibana. Di Taon
1980, malua ma ibana sian hurungan i nang so tingkina dope, siala gabe diorui
Presiden do partingkian uhumanna di hurungan i.
Asa on ma sada hasisintong ni
hata ni Tuhan i na gabe sijahaon sadarion, uju dilehon Tuhan i roha na imbaru
dohot tondi na imbaru, jala laos ungkap rohanta manjanghonsa, tuk do huasoNa
mangunsat angka roha batu sian rohanta be.
Antong rade ma hita mangungkap
rohanta be, asa mangula haimbaruon na sian Tuhanta dibagasan ngolunta laho
paubahon hadirionta lam tu dengganna jala hombar tu na hinalomohon ni Tuhanta
i.
Tidak ada komentar:
Posting Komentar