Sijahaon Ganup Ari - Kamis 16 Januari 2020 - Rom 6 : 11

Suman tusi ma rajumi hamu dirimuna songon naung mate di dosa i, alai mangolu di Debata di bagasan Kristus Jesus.

Halak na tutu porsea sasintongna nunga mian be “di bagasan Kristus” (en Kristo – εν κριστο) ala pandidion i. Nunga bali ibana sian gomgoman ni dosa tu hangoluan na manongtong. Halak na tutu porsea, naeng ma dipasiding dirina sian dosa: ndang sai torus be nian mardosai; sabalikna, molo sai tongtong dope mian di bagasan dosa, laos i ma patandahon na so tutu dope ibana porsea tu Jesus.

Sude na porsea di Debata marhite Jesus Kristus, i ma nanung tardidi tubagasan Goar ni Debata Sitolusada.  Hadirion ni angka na porsea i digoari do jolma na imbaru manang naung malua. “Asa molo dibagasan Kristus halak, na tinompa na imbaru ma i. Nunga salpu pangalaho na robi, gabe na imbaru” ( 2 Korint 5: 17).

Asa marhite i sasintongna, patut ma dohononta nian :

“ Najolo tarihot do ahu tu hamatean ala ni dosa, alai nuaeng gabe malua dung di bagasan Tuhan Jesus Kristus “

Dohononta ma muse : “ Najolo mangolu holan tu diringku sandiri do ahu, alai anggo nuaeng gabe mangolu tu Debata do ahu “

Jala ingkon dohononta ma muse : “ Najolo holan hagiot ni rohangku do na  hulului, alai anggo nuaeng mangulahon lomo ni roha ni Debata do hasudungan ni rohangku “ 

Jala na parpudi ingkon boi ma muse nian dohononta paboa : “  Najolo sai dilelei biar do ahu mida hamatean, alai anggo nuaeng nunga hujalo tondi hagogoon sian Debata Jahowa, ima Tondi  na mangonjar tondingku masihol asa gira marsada ahu dohot Debata na di bagasan Jesus Kristus  marhite hamatean i ( 2 Tim.1: 7) “ .

HAGIGIHON MA DOSA JALA MANGOLU MA HITA DI DEBATA DIBAGASAN KRISTUS JESUS.