Sijahaon Ganup Ari - Rabu 15 Januari 2020 - Ulaon ni Apostel 2 : 38

Ulaon Apostel 2 : 38

Alai didok si Petrus ma tu nasida: Pauba hamu ma rohamuna, dung i padidihon hamu ma ganup hamu tubagasan Goar ni Jesus Kristus, bahen hasesaan ni dosamuna, asa dijalo hamu silehonlehon i, i ma Tondi Parbadia i.

Aha do tanda ni hamubaon ni roha ? Dibagasan haporseaon ni halak Kristen, “mamparbuehon na denggan” i do tanda ni hamubaon ni roha. Asa molo didok hamubaon ni roha, ndang holan marhite hata manang tangiang manopoti dosa tanda ni na marhamubaon ni roha. Ndang alani naung gabe parsidohot di angka ulaon ni huria, alai parbue ni hamubaon ni roha i ingkon tarida jala boi dipanghilalahon dongan jolma.

Hamubaon ni roha ndada holan pandohan sambing na hinatahon dijolo ni na torop. Alai, halak na porsea na marsitutu laho paubahon roha ingkon sian nasa rohana manopoti dosa di adopan ni Debata. Ai torop do halak na malo manghatahon dohot manghatindanghon hamubaon ni rohana, alai mansai godang dope angka naniulana na so dihalomohon ni Debata. Jala torop do halak na boi patuduhon denggan ni pangalahona di jolo ni dongan jolma, alai di pudi, di na so panagaman, ramun do pangalahona jala angka na jahat do ditahi rohana.

Ditingkian on, dipanghulingi hata ni Debata do hita marhite Simon Petrus na mandok : “ pauba hamu ma rohamuna “ Antong aha ma alusta di pandohan i ?

Halak naung paubahon rohana, ingkon tarida do i sian parbue ni ngoluna. Tatiru ma angka natorop na manungkun si Johannes Pandidi di Lukas 3 ; “dia ma sibahenonnami?”  Alus ni si Johannes na parjolo tu jolma na torop: Holong maradophon dongan jolma ndada holan di hata manang holan hatahata sambing, alai marhite pangulaon. Ndang dipatorang si Johannes Pandidi holong i marhite teori alai marhite praktek do. Holong i ndang sihatahonhon alai siulahononhon (Lukas 3 : 11).