Sijahaon Siganup Ari - Sabtu 18 Januari 2020 - Psalmen 40 : 9

Psalmen 40 : 9

Dipangido rohangku do patupahon lomo ni roham, ale Debatangku, jala di parsitongaan ni rohangku do patikmi.

Aha do na pinangido ni rohanta masa dingolunta on siganup ari ? 

Mangalusi sungkun-sungkun on, tontu dohononta ma ra, na dipangido rohangku ima : singkop ma nian saluhut angka na dibagasan rohangku, masa ma nian saluhut angka na nihirim dingolu on, dna. Saluhut angka pangidoan somal do i angka na marhadomuan tu angka hagiot ni rohanta be.

Dang piga be ra sian hita jolma na marpangidoan songon pangidoan ni par Psalmen di ayat sijahaonta sadarion di Psalmen 40 : 9 on. Dang adong pangidoan ni par Psalmen asing sian na patupahon lomo ni roha ni Debata di ngoluna, dohot mangulahon patikNa.

Tontu naung dihilala par Psalmen on do pangurupion manang pandonganion ni Debata di ngolu naung binolusna, umbahen na tubu sada panindangion paboa na holan sangkap ni Debata do ingkon pamasaonna dingoluna siganup ari.

Songon halak na porsea, tontu hita pe nunga manghilala di angka pambahenan ni Debata dingolunta on. Ragam do sasintongna angka pangurupion ni Debata naung tajalo diparadalan ni ngolunta on.

Borhat sian pangurupion ni Debata naung tajalo dingolunta on, naeng ma i nian mangonjar rohanta patupahon sada prinsip, paboa na ingkon lomo ni roha ni Tuhanta i ma nian na ingkon pamasaonta dingolunta on.

Itajalo ma gogo sian Tuhanta i, asa tongtong lomo ni rohaNa na tapatupa dingolunta on, jala tongtong girgir mangulahon angka patikNa i. Amen.