Sijahaon Ganup Ari - Senin 27 Januari 2020 - Jesaya 60 : 22

Ragam do parsorion na niae ni bangso Israel tagan tarbuang nasida.  Secara fisik tarbuang songon sada bangso, secara psikis; malengleng rohanasida siala pandaraman dohot rasa aman, jala secara theologis, tarbuang sian Sion; huta nauli jala na songkal na hinaporseaan nasida Dolok ni Debata. Sandok tung paet do diae nasida apala dibona ni masa habuangan i.

Dung dihabuangan Babel bangso Israel, mandele jala magopu rohanasida ndang adong be panghirirmon di nasida, ai ninna rohanasida do, “Bangso ni Debata ma hita na margoar Israel, alai apala tung hita ma dibaen Debata tu habuangan”. Boasa apala bangso ni Debata loasonNa tarbuang ? Songon i ma pergumulan dibagasan roha ni halak Israel. Diajar Debata do nasida marhite habuangan i, asa unang ginjang rohanasida songon bangso ni Debata. Diloas Debata nasida tarbuang, ndada nanaeng bolonghonon ni Debata nasida, alai sabalikna, marhite pembuangan i adong 2 bagian sangkap nauli sian Debata di nasida, adong missi khusus ni Debata, ima: a). Asa marhite pembuangan i dapot pasupasu bangso na asing marhite Israel. B).Asa marhite habuangan i lam terdidik bangso Israel mananda Debata, jala olo nasida satia tu Debata. Ndang ro disalelengnilelengna nasida di habuangan i, alai di sada tingki, ingkon boanon ni Debata do nasida muse mulak tu Jerusalem.

Di situasi si songon i ma ro panurirang Jesaya pasahathon apulapul: paboa, molo tung pe gabe hira metmet hajongjongan nasida hatiha i, alai paulakon ni Debata do nasida  songon bangso na bolon.

Ndang dipasombgu Debata bangsoNa dibagasan panaritaon, haporsuhon dohot parhatobanon alai ditatap do pardangolan, nang panaritaan dohot haporsuhonna marhite asi dohot holong ni rohaNa. Manongtong do asi ni roha ni Debata jala tung singkop dipatuduhon dibagasan anakNa Jesus  na sinuruNa ro tu portibi on gabe jolma.

Halak Kristen di tingki on tongtong do dijou jala ditatap Debata jala hot do asi ni rohaNa dohot bagabaga haluaon i. Ala ni i nang hita pe naeng ma tongtong pos rohanta jala manghirim di Tuhan Jesus i. Ai na ummetmet i boi do paubaonna gabe saribu, jala na so piga gabe bangso na bolon. Tung songon dia pe hadirionta ditingki on, tuk do huaso ni Tuhanta i paubahonsa. Amen.