Sijahaon Ganup Ari - Rabu 29 Januari 2020 - Lukas 4 : 15

Mangajari do Ibana di angka parguruannasida, jala saluhut do mamuji Ibana.

Haroro ni Tuhan Jesus tu portibi on songon sahalak Mesias na miniahan, na gabe hasasaut ni bagabaga ni Debata do i ditonga-tonga ni hajolmaon. HaroroNa ima laho mamaritahon barita na uli tu saluhut jolma.  

Dung tardidi jala dung diunjuni si bolis, disonggopi Tondi Parbadia ma Jesus i. Asa huaso dohot gogo dibagasan Tondi Parbadia ido na mandongani jala na mangiring Ibana sahat tu luat Galilea laho mangajari di Sinagoge (inganan parsombaon ni halak Jahudi tu Debata).

Ulaon na mangajari ima na gabe ulaon parjolo na binahen ni Jesus, jala uju na mangajari i Ibana diangka parguruan nasida, saluhut do mamuji Ibana.

Ulaon ni Tondi Parbadia ido na margogoihon Ibana mangajarhon taringot tu harajaon ni Debata tu saluhut angka na tumangihon pangajarionNa. Pangajarion taringot tu saluhut angka naung hea disuriranghon angka Panurirang, jala laos di hatiha i ma didok Jesus paboa saluhut angka na sinuriranghon ni angka panurirang nunga tingkina be masa di haroroNa i.

Pangajarion ido na parjolo diulahon Jesus, ala dihilala Ibana do hinaringkot ni pangajario i. Patupahon pangajarion taringot tu barita na uli, gabe sada ulaon na ingkon ulahononhon do i disaluhut angka panggulmiton ni ngolunta.

Ringkot do hasomalan mangajarhon hata ni Debata dibagasan ngolunta on, isarani : ngolu keluarga, di parkarejoan, diangka parsaoran, nang di saluhut tahe angka rumang ni ngolunta.

Mangajari nuaeng on ndada holan na marrumanghon pangajarion Verbal (pandohan/hata), alai mangajari pe boi do marrumanghon parange/parulaon. 

Adong do hea mandok : tumagon do inna sada parange na denggan sian saribu pandohan na denggan. Na didokna disi, dang gabe so ringkot pangajarion verbal, alai asa unang ma nian holan di hata angka pangajarion i, asa tarida ma nian sian ulaonta manang parangenta/ pambahenanta na boi gabe tiruan manang parsiajaran tu angka na marnidasa manang na manghilalahon parulaonta i.

Asa dohonon ma, naeng ma nian marhite aha na taula gabe mutiha na arga i jala parsiajaran na boi paubahon roha ni jolma. Dipargogoi Tondi ima hita mangulahonsa. Amen.

Sijahaon Manogot    : 5 Musa 30 : 11 - 20

Sijahaon Bodari        : Lukas 1 : 67 - 79